Wanawake Saudia wanashiriki uchaguzi kwa mara ya kwanza

Uchaguzi wa mabaraza ya miji unafanyika leo nchini Saudi Arabia huku wanawake wa nchi hiyo wakishiriki katika uchaguzi kwa mara ya kwanza kabisa katika historia ya nchi hiyo ya Kiarabu.

Wanawake wa nchi hiyo leo wameelekea katika masanduku ya kupigia kura kuwachagua wawakilishi wao wa mabaraza ya miji kwa mara ya kwanza kabisa baada ya kupata haki ya kupiga kura na pia kusimama kugombea nafasi za mabaraza ya miji.

Katika uchaguzi wa leo ambao ni wa aina yake kwa wanawake wa Saudi Arabia, zaidi ya wagombea elfu tano wanaume na wagombea 980 wanawake wanachuana kuwania viti vya mabaraza ya miji.

Taarifa zaidi zinasema kuwa, wanawake laki moja na thelathini elfu walijiandikisha kwa ajili ya kushiriki katika uchaguzi wa leo huku wanaume milioni moja na laki tatu na nusu wakiwa nao wamejiandikisha kama wapiga kura.

Mabaraza ya Miji ndio bodi pekee ya serikali ambayo wananchi wa Saudia wanaruhusiwa kuchagua wawakilishi wao huku nyadhifa nyingine muhimu serikalini zikiwa ni za kurithishana baina ya ukoo wa Aal Saud na wananchi hawana nafasi yoyote katika uteuzi huo.

Licha ya wanawake wa Saudia kuruhusiwa kuwa wagombea na wapiga kura, wachambuzi wa mambo wanasema kwamba, wana nafasi ndogo mno ya kushinda na kuwa wawakilishi wa mabaraza ya miji.

Wanawake wa Saudi Arabia wanaruhusiwa kupiga kura katika mabaraza ya miji ilihali hadi leo bado hawajaruhusiwa kuendesha gari.