Rais Robert Mugabe ataka wanaomkosoa wapatiwe adhabu kali

Rais wa Zimbabwe Robert Mugabe amewatahadharisha mashujaa wa vita vya uhuru ambao wameonya kuwa huenda wakakataa kuunga mkono serikali yake kufuatia mporomoko mkubwa zaidi wa uchumi kuwahi kushuhudiwa nchini humo.

Rais Mugabe amewaonya maveterani wa vita wanaomkosoa akieleza kwamba, watakabiliwa na adhabu kali endapo hawataachana na msimamo wao huo. 

Mashujaa hao wanaonya kuwa watakataa kumuunga mkono Mugabe endapo hataweka mikakati ya kukomesha ubadhirifu wa mali ya umma na ufisadi uliokithiri nchini humo na kusababisha maandamano makubwa zaidi.

Rais Mugabe amewaonya mashujaa hao alipokuwa akihutubia umati wa wafuasi wa chama tawala cha Zanu-PF. 

Aidha rais huyo amewataka viongozi wa chama cha mashujaa kuwachagua viongozi wapya.

Mugabe amesema kuwa, viongozi wa mashujaa hao wa vita vya ukombozi kutoka mikononi mwa wakoloni kuwa walikuwa wameshawishiwa na mataifa ya Magharibi.

Mugabe ameonya kuwa wale ambao wanaendeleza maandamano yaliyoshuhudiwa katika siku za hivi karibuni huenda wakafungwa jela kwani taifa hilo halina haja ya mapigano ya wenyewe kwa wenyewe.

Hivi karibuni maveterani wenza wa Rais Robert Mugabe wa Zimbabwe ambao wamekuwa waungaji mkono wake wakubwa, kwa mara ya kwanza kabisa walimtuhumu kiongozi huyo kuwa ni dekteta, matamshi ambayo yalitathminiwa na weledi wa mambo kama yataimarisha harakazi za upinzani dhidi ya Mugabe mwenye umri wa miaka 92.

Umoja wa Mataifa: Kesi 120 za ubakaji zimeripotiwa Sudan Kusini

Umoja wa Mataifa umetangaza kuwa, kwa uchache kesi 120 za ukatili wa kijinsia na ubakaji zimeripotiwa Sudan Kusini tangu kuibuka machafuko mapya nchini humo majuma matatu yaliyopita.

Farhan Haq, msemaji wa Umoja wa Mataifa amesema kuwa, kikosi cha kusimamia amani cha umoja huo kingali kinapokea taarifa za vitendo vya ukatili wa kijinsia, ubakaji na ubakaji wa makundi.

Taarifa za awali zinaonesha kuwa, baadhi ya wabakaji hao walikuwa na sare za jeshi.

Msemaji wa Umoja wa Mataifa ameongeza kuwa,  kikosi cha kusimamia amani cha UN huko Sudan Kusini kimeongeza doria zake na kinafanya juhudi za kuwalinda wanawake katika mji mkuu Juba na katika miji mingine kutokana na kukithiri kesi za ubakaji na ukatili wa kijinsia.

Amesema, Umoja wa Mataifa unazitaka pande zote hasimu nchini Sudan Kusini kuwashughulikia wale wote wanaopatikana na hatia ya kujihusisha na vitendo vya ukatili wa kijinsia na ubakaji.Machafuko mapya mjini Juba yaliibuka tarehe saba mwezi huu ambapo hadi sasa watu zaidi ya 300 wameripotiwa kuuawa na makumi ya maelfu ya wengine wamelazikika kukimbia nchi. 

Kadhalika machafuko hayo yameathiri makubaliano ya amani yaliyotiwa saini mwaka jana 2015 kati ya mahasimu hao wawili.Riek Machar hajaonekana hadharani tangu kulipotokea machafuko mjini Juba hali ambayo imepelekea kuibuka tetesi kwamba, huenda kiongozi huyo ameuawa. Hata hivyo Balozi wa Sudan Kusini nchini Kenya Jimmy Deng Makuach amekanusha madai hayo.