Kiongozi atahadharisha kuhusu njama za adui

Kiongozi Muadhamu wa Mapinduzi ya Kiislamu Ayatullah Sayyid Ali Khamenei

Kiongozi Muadhamu wa Mapinduzi ya Kiislamu Ayatullah Sayyid Ali Khamenei ametahadharisha kuhusu njama za adui zenye lengo za kuudhihirisha Uislamu kuwa ni tishio.

Akizungumza hii leo katika Akademia ya Jeshi ya Imam Ali mjini Tehran, Kiongozi Muadhamu wa Mapinduzi ya Kiislamu ameongeza kuwa wenye nia mbaya duniani na wanaotumia mabavu wanataka kutumia sanaa, siasa, nguvu za kijeshi na njia nyinginezo kuzuia sauti ya Uislamu isisikike na hilo linathibitishwa na woga unaokua wa madola ya kibeberu.

Amiri Jeshi Mkuu wa Jamhuri ya Kiislamu ya Iran amesisitiza kuwa hii leo, madikteta wa kimataifa wana wasiwasi mkubwa kuhusiana na nguvu za Uislamu na ndiyo maana wanatumia uwezo wao wote kueneza chuki dhidi ya dini hii tukufu duniani.

Kuhusiana na wanamgambo wa kundi la kitakfiri la Daesh wanaosababisha machafuko huko Iraq na Syria, Kiongozi Muadhamu amesema magaidi hao wamefanya uhalifu mkubwa katika nchi hizo, ikiwemo mauaji ya umati ya raia pamoja na wanajeshi na maafisa wa usalama.

Chanzo: http://kiswahili.irib.ir/habari/habari/item/44536-kiongozi-atahadharisha-kuhusu-njama-za-adui

Hamad:Ukawa utasimamisha mgombea mmoja Urais

Katibu Mkuu Wa Chama cha Wananchi CUF, Mhe. Maalim Seif Sharif Hamad

Katibu Mkuu Wa Chama cha Wananchi CUF, Mhe. Maalim Seif Sharif Hamad amesema umoja wa katiba yawananchi Ukawa wakati utakapofika utahakikisha unaweka mgombea mmoja wa Urais aliye madhubuti mwenye uwezo wa kusimamia mabadiliko na kutatua shida zinazowakabili Watanzania.

Maalim Seif amesema hayo katika mkutano wa hadhara uliofanyika katika uwanja wa Manzese kwa Bakhresa mara baada ya kumaliza ziara ya kukagua uhai wa chama, kuzindua ofisi mpya za mitaa na Kata katika Wilaya za Temeke, Kinondoni na Ilala Dar es Salaam.

Maalim Seif amesema lengo la ushirikiano wa vyama hivyo ni kuwaongoza wananchi kukikataa CCM kwa vile kwa muda wa miaka 53 kimeshindwa kuweka sera nzuri zitakazowaletea maisha bora Watanzania.

Ameeleza kuwa chini ya Serikali itakayoongozwa na Ukawa kila mtu atakuwa na haki ya kujiamulia ni namna gani anataka kuishi kwa sababu kipaumbe kitakuwa ni kuwapatia wananchi uwezo ukiwemo wa kitaaluma kumuwezesha kila mtu kutumia kipaji chake kuishi maisha bora.

Maalim Seif alisema hayo yanawezekana na zipo nchi kama Korea ya Kusini ambazo zilipata uhuru wake sawa na Tanganyika, lakini nchi hizo zimeweza kupiga hatua kubwa kimaendeleo na kuzikaribia nchi zinazoitwa zimeendelea.

Amesema chini ya utawala wa CCM hali ni tafauti kwa sababu elimu inapatikana kwa matabaka kwa kuzingatia wenye uwezo ambao wanamudu elimu bora na wasiokuwa na uwezo ambao wamekuwa wakiishia katika shule za Kata zenye mazingira duni .

“Huu wetu ni umasikini wa kujitakia, nchi yetu ina utajiri mkubwa kuna kila aina ya madini, lakini wanaonufaika ni wageni na viongozi mafisadi, tushirikiane kuiondoa CCM tujenga Tanzaia mpya yenye matumaini”, alihimzia Maalim Seif. 

Naibu Katibu Mkuu wa CUF Tanzania Bara, Magdalena Sakaya akizungumza katika mkutano huo alisema kutokana na sera mbaya za CCM nchi imekosa viwanda ambavyo vina nafasi kubwa ya kuleta ajira na kupunguza umasikini miongozi mwa wananchi.

Alisema wakati Tanzania ni nchi inayotegemea zaidi shughuli za kilimo na ufugaji, hakuna viwanda vya kusindika nyama, maziwa wala mazao ya kilimo na kila kitu kinaagizwa kutoka nje ya nchi.

“Hii ni aibu CCM haina sera zenye mwelekeo wa kuwaletea maisha mazuri wananchi, leo hii ni miaka minane wafanyabiashara wadogo wameahidiwa kupatiwa eneo la Machinga Complex lakini hakuna kilichoendelea ni ahadi zisizotekelezwa”, alisema Sakaya.

Mbunge wa Viti Maalum Kulthum Mchuchuri alisema uchaguzi wa Serikali za mitaa unaotarajiwa kufanyika Disemba 14 mwaka huu utumiwe na wananchi kukikataa CCM ili iwe salamu tosha kwamba wananchi wameamua kukiweka pembeni.

'Daesh inakiuka Uislamu na ubinaadamu

Wanamgambo wa kikundi cha Daesh wakiwaua watu bila kuwa na makosa.

Serikali ya Morocco imeitaka jamii ya kimataifa kupambana vilivyo na wanachama wa kundi la kigaidi na kitakfiri la Daesh. Ripoti iliyotolewa leo na Wizara ya Mambo ya Nje ya Morocco imesisitiza kuwa, vitendo vinavyofanywa na kundi hilo ni kinyume kabisa na misingi ya dini ya Kiislamu na ni kinyume na ubinaadamu.

Sanjari na kulaani mauaji ya Peter Kassig, aliyekuwa akishikiliwa na wanachama wa kundi hilo la kitakfiri linalofanya jinai kwa jina la Uislamu, Wizara ya Mambo ya Nje ya Morocco imetaka kuzidishwa juhudi katika mapambano dhidi ya kundi hilo. 

Jana kundi hilo lilisambamba mkanda wa video ulioonyesha kuuawa Peter Kassig. Peter alitekwa nyara na kundi hilo mwaka jana nchini Syria na kupelekwa kusikojulikana. 

Kwengineko Wizara ya Ulinzi nchini Iraq, imetangaza kupinga mpango wowote wa Marekani kwa kuingia kijeshi kwa ajili ya kuukomboa mji wa Mosul kutoka mikononi mwa wanachama wa Daesh. Khaled al-Obeidi, Waziri wa Ulinzi wa Iraq amesema kuwa, jeshi la nchi hiyo ndilo litakaloukomboa mji huo bila kuhitajia msaada wa Marekani. 

Hayo yanajiri katika hali ambayo viongozi kadhaa wa Iraq, wametangaza upinzani wao juu ya mpango wa Marekani kutuma askari wake wengine kwa ajili ya kupambana na kundi hilo, wakisema kuwa hatua hiyo ni uvamizi mwengine wa Washington dhidi ya ardhi yao. 

Baadhi wamenukuliwa wakisema kuwa, operesheni za Marekani nchini Iraq dhidi ya Daesh, itakuwa na matokeo mabaya kwa taifa na watu wa Iraq.

 Chanzo: http://kiswahili.irib.ir/habari/habari/item/44559-daesh-inakiuka-uislamu-na-ubinaadamu

Mujuru atuhumiwa kutaka kumuua Rais Mugabe

Joice Mujuru Makamu wa Rais wa Zimbabwe

Joice Mujuru Makamu wa Rais wa Zimbabwe anakabiliwa na tuhuma za kutaka kumuua Rais Robert Mugabe wa nchi hiyo. Gazeti la Sunday Mail linalochapishwa Zimbabwe limeandika katika toleo la jana kwamba, 

Bi. Joice Mujuru pamoja na wasaidizi wake wawili wanahusishwa kwenye njama za kutaka kumuua Rais Mugabe aliyeiongoza nchi hiyo tokea ilipojipatia uhuru wake mwaka 1980. 

 

Hayo yanajiri katika hali ambayo, mirengo ya kisiasa ndani ya chama tawala cha ZANU PF inafanya juhudi ya kupata satua na ushawishi mkubwa kwa wanachama wa chama hicho, kabla ya kufanyika mkutano mkuu uliopangwa kuitishwa mwezi ujao. 

Bi Joice Mujuru amekuwa akishirikiana bega kwa bega na Rais Mugabe kwa kipindi kirefu, lakini katika miezi ya hivi karibuni amekuwa kwenye malumbano makali ya kisiasa na Grace Mugabe, mke wa Rais Robert Mugabe. 

Grace Mugabe amekuwa akimtuhumu Joice Mujuru Makamu wa Rais kwa kupanga njama za kumpindua Rais Mugabe. 

Vita vya kugombania madaraka ndani ya chama tawala vimeshadidi baada ya Grace Mugabe ambaye ni mkuu wa umoja wa vijana wa chama tawala, kupata uungaji mkono mkubwa kutoka kwa Emmerson Mnangwaga mwanasiasa mwenye ushawishi mkubwa ndani ya chama tawala cha ZANU PF. 

Chanzo: http://kiswahili.irib.ir/habari/afrika/item/44527-makamu-wa-rais-atuhumiwa-kutaka-kumuua-mugabe