"Dk. Shein na mawaziri wake wamekuwa wakibakia madarakani kwa ubabe tu"Maalim Seif Shariff

MAKAMU wa Kwanza wa Rais wa Zanzibar, Maalim Seif Shariff Hamad ametangaza rasmi kuwa yeye si makamu tena kwa sababu muda wa serikali iliyoongozwa na Dk. Ali Mohamed Shein kikatiba ulikwisha tangu tarehe 2 Novemba, 2015.

Amesema kwa mujibu wa Ibara ya 28(2), muda halali wa rais utakuwa umefikia kikomo itakapotimu miaka mitano tangu siku ambayo kiongozi huyo alikula kiapo cha utii cha kushika wadhifa huo.

Wakati huohuo, amesema Rais John Magufuli anapaswa kuchukua uongozi wa juhudi za kutafuta ufumbuzi wa mgogoro wa kisiasa wa Zanzibar, baada ya kuonekana kuwa wenzake hawana nia njema.

Maalim Seif amewaambia wahariri na waandishi wa habari kwenye ukumbi wa Hoteli ya Serena ya jijini Dar es Salaam leo kwamba Dk. Shein na mawaziri wake wamekuwa wakibakia madarakani kwa ubabe tu kwa kuwa kikatiba muda wa serikali yake ulishakwisha.

“Mimi si Makamu wa Kwanza tena. Kama kubakia basi nimebaki kwa sababu ya kuweka kinga tu ya wafuasi wetu kwa kuwa hata mwenzangu Dk. Shein ambaye pamoja na mimi ndio hatutegemei kuwepo kwa Baraza la Wawakilishi, yupo lakini si rais halali kwa sababu hiyo hiyo ya kumaliza muda wake,” amesema.

Hilo la kama yeye bado ni Makamu wa Kwanza wa Rais au laa, ni moja ya maswali aliyoulizwa katika mkutano huo aliouitisha kwa lengo la kuzungumzia mazungumzo yanayofanyika ya kutafuta utatuzi wa mgogoro wa kisiasa wa Zanzibar.

“Ukweli uongozi wa Dk. Shein upo kibabebabe tu lakini ulishamaliza muda wake rasmi Novemba 2, 2015. Ndio maana tunasema kwamba kitendo cha Jecha Salim Jecha kuufuta uchaguzi pasina kuwa na mamlaka kumeifanya Zanzibar kutokuwa na serikali wala Baraza la Wawakilishi,” amesema.

Amesema yeye yupo kwa sababu na hao wenzake wanaendelea kushikilia nafasi zao, lakini kwake kuwepo ni muhimu kwa kuwa bila ya hivyo wafuasi wake watapata madhara makubwa.

Maalim Seif ametoa msimamo huo huku akiwa ameshasoma taarifa ndefu ya maandishi iliyojaa ufafanuzi wa vifungu mbalimbali vya sharia kuelezea msimamo wake na Chama cha Wananchi (CUF) kuwa Dk. Shein si rais halali na wala mawaziri si halali.

CUF ilishatangaza kuwa mawaziri wake saba katika Baraza la Mawaziri la Dk. Shein hawapo kazini tangu Novemba 12 siku ambayo kimahesabu ilitarajiwa kuwa ya mwisho kwa mamlaka ya Rais kuweza kuitisha Baraza la Wawakilishi iwapo kungetokea dharura kabla ya kuapishwa kwa baraza jipya baada ya uchaguzi.

Maalim Seif ambaye aliambatana mkutanoni hapo na wasaidizi wake katika chama, wakiwemo wajumbe wa Baraza Kuu la Uongozi la Taifa (BKUT), amesema mazungumzo yake na Dk. Shein pamoja na marais wastaafu wa Zanzibar, yamefikia hatua ngumu kukamilika.

Amesema kwamba baada ya kuwa hawajaafikiana kutoka na kila upande kubaki na msimamo wake – yeye akishikilia kuwa uchaguzi haukufutwa kihalali kwa mujibu wa sharia, na wenzake CCM Dk. Shein na Makamu wa Pili wa Rais Balozi Seif Ali Iddi kushikilia lazima uchaguzi urudiwe – ilitakiwa Dk. Shein aitishe kikao cha mwisho cha kusomwa taarifa ya yale waliyojadiliana.

“Dk. Shein amekuwa akikwepa kuitisha kikao hicho kwa wiki mbili ameshinda kukiitisha licha ya mimi kumuandikia barua na kumkumbusha… amekuwa akisema kwamba bado wanahitaji muda zaidi kujadiliana na wenzake,” amesema na kuamini kuwa tayari mwenendo huo ni uthibitisho kuwa tangu awali Dk. Shein hakuwa na nia njema katika kuitisha mazungumzo hayo.

Maalim Seif amesema baada ya vikao vinane kufanyika huku wananchi wakiwa wamekaa kimya wakisubiri, anadhani ni muhimu wananchi wajulishwe kinachoendelea hasa kwa kuwa haoni kama viongozi wenzake hao wa CCM wana dhamira njema ya kuondoa mgogoro.

 

Katika taarifa aliyoisoma huku matangazo ya mkutano huo yakirushwa moja kwa moja hewani na vituo vitatu vya televisheni – Azam, ITV na Star TV – Maalim Seif amesema badala ya Dk. Shein kuitisha kikao cha kuwezesha taarifa iliyoandaliwa na sekretarieti kusomwa, zipo taarifa za uhakika kuwa CCM imeagiza Tume ya Uchaguzi ikutane Januari 14, ili kutangaza tarehe ya uchaguzi wa marudio.

Amesema hoja ya uchaguzi wa marudio ilishindwa mapema, kwa sababu haina msingi wowote wa kisheria hasa kwa vile Tume yenyewe iliridhika kuwa uchaguzi ulikwenda vizuri mpaka hatua ya utangazaji wa matokeo.

“Hata ukisoma tovuti ya Tume ya Uchaguzi utakuta taarifa ya mwisho iliyomo ni inayosema uchaguzi katika hatua zake zote mpaka kufikia kutangaza matokeo ya kura ulikwenda vizuri… ukizingatia na taarifa za waangalizi wa uchaguzi wa ndani na wa kimataifa, hakuna hoja ya kurudiwa uchaguzi.

“Hawa CCM kila wanakokwenda na hata katika mazungumzo wanapotakiwa wawasilishe mezani ushahidi wa uchaguzi kuvurugika wanashindwa kutoa vielelezo vyovyote. Sasa uchaguzi urudiwe kwa hoja ipi kama hakuna ushahidi kuwa uliharibika,” amesema.

Maalim Seif amesema wakati Jecha anatoa tangazo la kufuta uchaguzi, Oktoba 28, mwenyekiti huyo mwenyewe alikuwa ameshatangaza matokeo ya majimbo 33 na majimbo yaliyobaki kura zilishajumuishwa.

Amesema Oktoba 28 ilikuwa siku ya mwisho kisheria kwa Tume kukamilisha kazi ya kutangaza matokeo ya urais na kwa hivyo “ilitakiwa Jecha aongoze kikao cha kukamilisha kazi hiyo lakini hakuonekana kazini, na makamu mwenyekiti akalazimika kuendesha kikao lakini ghafla Jecha akasikika anatoa tangazo la kufuta uchaguzi, hatua ambayo hana mamlaka nayo kisheria.”

Maalim Seif amesita kueleza CUF itakachokifanya iwapo Tume itaridhia shinikizo za uongozi wa juu wa CCM Zanzibar, kutangaza tarehe ya uchaguzi wa marudio.

Hata hivyo amesema hali hiyo itakapotokea itakuwa ni juu ya kikao cha juu cha chama – Baraza Kuu la Uongozi – kutoa uamuzi baada ya kupata maelezo ya matokeo ya mazungumzo.

Amesema ni wakati sasa wa Rais wa Jamhuri ya Muungano wa Tanzania, Dk. John Magufuli kutumia mamlaka yake kuongoza juhudi za utatuzi wa mgogoro huo kwa kuwa bado anaamini kuwa ana dhamira ya kutimiza ahadi yake ya kusisitiza haja ya mgogoro huo kutatuliwa kwa amani na maridhiano.

TFDA yajidhatiti kukabiliana na matumizi ya chakula kisicho salama.

Meneja Mawasiliano na Uhusiano wa  Umma wa Mamlaka ya Chakula na Dawa (TFDA) Bi Gaudensia Simwanza akiwaeleza waandishi wa Hababari leo Jijini Dar es salaam kuhusu hatua zinazochukuliwa na Mamlaka hiyo katika kukabiliana na  madhara yatokanayo na matumizi ya chakula kisicho salama. Kulia ni Meneja Uchanganuzi wa madhara yatokanayo na chakula bi Candida Shirima.PICHA NA FRANK MVUNGI-MAELEZO

Afisa Elimu kwa Umma wa Mamlaka ya Chakula na Dawa (TFDA) akitoa wito kwa wananchi kushirikiana na Serikali ili kudhibiti uingizwaji wa bidhaa ambazo hazijasajiliwa hapa nchini kwa maslahi ya Taifa.kulia Meneja Mawasiliano na Uhusiano wa  Umma wa Mamlaka hiyo Bi Gaudensia Simwanza

………………………………………………………………………………………………………….

Na Frank Mvungi-MAELEZO

Serikali yajidhatiti kuwalinda wananchi kwa kuzuia athari za kiafya zinazoweza kujitokeza kutokana na matumizi ya chakula kisicho salama kote nchini.

Hayo yamesemwa leo jijini Dar es salaam na Meneja Mawasiliano na Uhusiano wa Umma wa mamlaka ya chakula na Dawa (TFDA) bi Gaudensia Simwanza.

“Uchafuzi wa chakula food contamination) hufanya chakula kisiwe salama na hivyo kusababisha madhara ya kiafya ya muda mfupi na muda mrefu na hata vifo kwa mlaji pamoja na athari za kiuchumi”alisisitiza Simwanza

AkifafanuaSimwanza amesema kuwa Serikali imekuwa ikichukua hatua madhubuti kukabiliana na tatizo hilo ikiwemo kutathmini bidhaa za chakula ili kuhakikisha kuwa zinakizi vigezo vya ubora na usalama kabla ya kusajiliwa.

Hatua nyingine ni usajili wa maeneo ya utoaji wa vibali vya biashara ya vyakula na kufuatilia ubora na usalama wa vyakula ndani na nje ya nchi.alibainisha simwanza.

Pia mamlaka hiyo imekuwa ikifanya uchunguzi wa sampuli za chakula katika maabara ili kutambua hali ya ubora na usalama wake pamoja ufuatiliaji wa usalama wa chakula ikiwa ni pamoja na uchafuzi wa sumu,kemikali,viuatilifu,vimelea,mabaki ya dawa za mifugo na mimea katika chakula.

Hatua nyingine ni kutoa elimu kwa jamii kuhusiana na shughuli za udhibiti wa chakula ili kuhakikisha usalama wa chakula hicho kwa wananchi watakaokitumia.

Mkakati mwingine ni wa kuanzishwa kwa mpango wa ufuatiliaji na ukusanyaji wa takwimu za magonjwa yatokanayo na chakula nchini.

Kwa upande wake Afisa Elimu kwa Umma Bw. James Ndege almetoa wito kwa wananchi kutoa ushirikiano kwa mamlaka hiyo ili iweze kutimiza majukumu yake kwa maslahi ya Taifa .

TFDA ni Taasisi iliyopo chini ya Wizara ya Afya,Maendeleo ya Jamii Jinsia Wazee na Watoto na ilianzishwa kwa mujibu wa sheria ya chakula , dawa na vipodozi sura 219 ambapo ina jukumu la kulinda afya ya jamii kwa kudhibiti ubora na usalama wa chakula hapa nchini.

Donald Trump aendelea kuushambulia Uislamu

Donald Trump, anayewania kuteuliwa na chama cha Repubalican kugombea urais wa Marekani ameendelea kutoa maneno ya jeuri na yaliyojaa chuki dhidi ya Waislamu kwa kudai kuwa eti Waislamu ndio waliofanya jinai ya Cologne, Ujerumani.

Shirika la habari la IRIB limeripoti habari hiyo leo na kusema kuwa, Trump ametoa madai hayo katika kampeni za uchaguzi kwenye jimbo la Iowa nchini Marekani na kudai kuwa, hadi hivi sasa Ujerumani ilikuwa haijawahi kushuhudia matukio hayo, lakini tangu nchi hiyo iliporuhusu wakimbizi Waislamu kuingia nchini humo, matukio hayo yameanza kutokea.

Ameongeza kuwa, kuruhusiwa kuingia wakimbizi Waislamu katika nchi za Magharibi kutaziletea matatizo nchi za bara hilo na amezitaka zisiruhusu Waislamu kuingia barani Ulaya.

Itakumbukwa kuwa, katika mkesha wa mwaka mpya wa 2016, wanawake wasiopungua 100 waliporwa na kudhalilishwa kijinsia na watu wasiojulikana mbele ya kanisa kuu la mji wa Cologne, nchini Ujerumani.

Kabla ya hapo pia, Trump aliitaka serikali ya Marekani isiruhusu Waislamu kuingia nchini humo baada ya kutokea mashambulizi ya kigaidi mjini Paris Ufaransa, na kuua watu 130.chanzo irib

Saudia yashambulia wagonjwa Yemen, yaua kadhaa

Katika kuendelea na jinai zake huko Yemen, ndege za kivita za muungano vamizi unaoongozwa na Saudi Arabia zimeishambulia hospitali moja kaskazini mwa nchi hiyo.

Televisheni ya al Mayadeen ya nchini Lebanon imeripoti kuwa ndege za kivita za Saudia leo zimeipiga kwa makombora hospitali moja katika mkoa wa Sa'ada kaskazini mwa Yemen ambayo inaendeshwa na Jumuiya ya Madaktari wasio na Mipaka na kuuwa wagonjwa wasiopungua watano na kujeruhiwa wengine kumi.

Ndege za kivita za Saudi Arabia pia zimeyashambulia maeneo ya al Asdad na Marih katika mkoa wa Sa'ada na kuuwa raia kadhaa. Ndege za Saudia pia zimelishambulia soko moja katika mji wa Razih kwenye mkoa huo wa Sa'ada na kuuwa watu watatu na kujeruhi wengine watano.

Katika upande mwingine makundi ya kujitolea ya wananchi wa Yemen yamejibu jinai za Saudi Arabia kwa kufanya operesheni katika baadhi ya maeneo ya Jizan na Najran kusini mwa Saudia na kuwatia mbaroni wanajeshi kadhaa wa Saudi Arabia.chanzo irib

Nigeria waandamana kupinga kukamatwa Sh. Zakzaky

Wananchi wa Nigeria wamefanya maandamano makubwa ya kulalamikia kukamatwa na kuendelea kushikiliwa kiongozi wa Harakati ya Kiislamu ya nchi hiyo, Sheikh Ibrahim Zakzaky.

Televisheni ya Press TV imeripoti kuwa, maandamano hayo yamefanyika katika mikoa mitano tofauti ya Nigeria na waandamanaji wametaka kuachiliwa huru mara moja mwanachuoni huyo bila ya masharti yoyote.

Waandamanaji hao wametaka pia kuachiliwa huru mamia ya wafuasi wa Sheikh Zakzaky waliotiwa mbaroni na jeshi la Nigeria.

Mwezi uliopita, jeshi la Nigeria lilifanya mashambulizi ya kikatili dhidi ya Waislamu katika mji wa Zaria, wakaua na kujeruhiwa watu wengi na wakamjeruhi vibaya kwa risasi kadhaa Sheikh Zakzaky kabla ya kumtia mbaroni na kumpeleka kusikojulikana.

Harakati ya Kiislamu ya Nigeria imesema kuwa, makumi ya Waislamu wanaendelea kushikiliwa na jeshi licha ya hali zao kuwa mbaya kutokana na majeraha. Aidha imesema, jeshi la Nigeria linawanyima hata matibabu majeruhi hao. Kwa uchache mmoja wa Waislamu hao ameshafariki dunia kutokana na majeraha.chanzo irib