Mapinduzi ya Kiislamu; kigezo cha kuiga katika kukabiliana na siasa za kibeberu za Magharibi -Sehem ya Kwanza

Assalaamu Alaykum wasikilizaji wapenzi na karibuni kuwa nasi katika mfululizo huu wa vipindi maalumu vinavyokujieni kwa mnasaba wa maadhimisho ya Alfajiri Kumi ya ushindi wa Mapinduzi ya Kiislamu ya Iran, ambapo leo tutayazungumzia Mapinduzi ya Kiislamu, kama kigezo cha kuiga katika kukabiliana na siasa za kibeberu za Magharibi. Endeleeni kuwa nami hadi mwisho wa kipindi kusikiliza niliyokuandalieni katika mfululizo huu.

MUZIKI
Ushindi wa Mapinduzi ya Kiislamu nchini Iran ni moja ya matukio makubwa zaidi ya karne ya 20; na likiwa moja ya matukio yasiyo na mfano wake katika zama hizi yalifungua ukurasa mpya katika historia ya mwanadamu na kuwa chemchemi ya mabadiliko makubwa katika nyuga za kiutamaduni, kisiasa, kijamii na kiuchumi. 

Mapinduzi ya Kiislamu kwa wananchi wa Iran lilikuwa ni hitajio na jambo la lazima, ambalo liligeuka kuwa mwanzo wa harakati mpya katika uga wa muqawama wa mataifa, katika kukabiliana na mifumo na tawala za kibeberu. Na ndiyo maana ushindi wa Mapinduzi ya Kiislamu ulikuwa ni tukio ambalo mwangwi wake ulivuka mpaka wa kieneo.

Kimsingi, kila Mapinduzi yanayojiri katika eneo la kijiografia la watu huwa na athari na kusababisha mageuzi na mabadiliko ya msingi; lakini kitu kinachoyalinda mapinduzi hayo na kuyafanya yadumu ni upana na ukubwa wa taathira zake.

 Sifa hii imeonekana kwa uwazi kabisa na kwa kiwango kikubwa katika Mapinduzi ya Kiislamu ya Iran; kiasi kwamba mataifa mengi ya wanyonge duniani yalihisi kuwa yataweza kupata matamanio na matarajio yao kwa kufuata kigezo cha Mapinduzi ya Kiislamu. 

Ushindi wa Mapinduzi ya Kiislamu ulivuruga mlingano uliokuwa ukitawala katika mfumo wa kisiasa wa kieneo na kimataifa; na kwa kutegemea msingi wa "nguvu ya wananchi" na "kupigania kujitawala" ukafanikiwa kuonyesha mfano wa kukabiliana na siasa za kibeberu. 

Kwa msingi huo, ushindi wa Mapinduzi ya Kiislamu nchini Iran ulizingatiwa na kupewa umuhimu kutokana na kuwa chemchemi ya kutoa ilhamu kwa mataifa yanayopigania uhuru na kujitawala duniani; na hadi leo hii pia licha ya kupita karibu miongo minne, yangali yanatoa ilhamu kwa harakati za kimapinduzi katika nchi mbalimbali.

Kwa mtazamo wa wana nadharia wa Mapinduzi yaliyojiri duniani, Mapinduzi ya Kiislamu ya Iran yana taathira tatu muhimu na za kudumu; na ndiyo sababu iliyoyafanya madola ya kiistikbari yachacharike na kuhaha kwa ajili ya kukabiliana na mapinduzi hayo. 

Taathira ya kwanza na muhimu zaidi ya ushindi wa Mapinduzi ya Kiislamu ya Iran ilikuwa ni kutoa changamoto kwa mfumo wa Ubeberu duniani. Kwa ushindi wake wenye lengo maalumu, mapinduzi haya yalionyesha kuwa hata kama taifa litakuwa mikono mitupu bila ya kuwa na silaha yoyote, linao uwezo wa kuwa chachu ya kuleta mabadiliko makubwa hata katika mlingano na mahesabu ya madola makubwa duniani. 

Taathira ya pili ni kwamba Mapinduzi ya Kiislamu yalionyesha nguvu na uwezo halisi wa taifa la watu bila ya kutegemea msaada na uungaji mkono wa lolote kati ya madola makuu ya dunia wakati huo. Na hiyo ndiyo sababu iliyoyafanya Mapinduzi ya Kiislamu yawe ni msukumo wa kujiri mageuzi makubwa ya kisiasa katika upeo wa ulimwengu mzima. 

 Mageuzi na mabadiliko hayo yaliwaonyesha walimwengu nguvu kubwa na uwezo wa kisiasa wa dini ya Uislamu na kuhuisha harakati adhimu ya kujikomboa na ubeberu na kusimama imara kukabiliana na ukoloni.