Wasomi wa Kiislamu Bahrain:Kesi dhidi ya Sh. Qassim ni bandia

Kundi la wanazuoni wa Kiislamu wa madhehebua ya Shia nchini Bahrain limesema tuhuma dhidi ya msomi mwenzao Ayatullah Sheikh Isa Qassim hazina msingi na kwa mantiki hiyo, kesi inayotazamiwa kuanza hii leo dhidi ya mwanachuoni huyo ni bandia.

Taarifa ya wasomi hao wa Kiislamu nchini Bahrain imesema kuwa, mashitaka anayolimbikiziwa msomi huyo mashuhuri ambaye utawala wa Manana umemvua uraia ni ya kubuni na wala hayana mashiko na kwamba kesi dhidi yake inakiuka katiba, haki za binadamu zilizoanishwa katika sheria za nchi hiyo na hata za kimataifa. 

Wanazuoni hao wa Bahrain wamesema kesi dhidi ya Ayatullah Qassim ni sawa na kesi dhidi ya Waislamu wote wa madhehebu ya Shia duniani.

Jumuiya ya Kimataifa ya Kukurubisha pamoja Madhehebu za Kiislamu, Kamisheni Kuu ya Haki za Binadamu ya Umoja wa Mataifa, shirika la kutetea haki za binadamu la Human Rights Watch na Jamhuri ya Kiislamu ya Iran ni baadhi ya nchi na asasi za kimataifa zilizotoa taarifa ya kulaani kupokonywa uraia Ayatullah Qassim, kwa madai kuwa ametumia vibaya nafasi yake kwa maslahi ya madola ya kigeni. 

Aidha hatua hiyo imekabiliwa na wimbi la maandamano kutoka nchi mbali mbali kama vile Iraq.Sheikh Qassim anatazamiwa kupandishwa kizimbani hii leo, ambapo utawala wa Manama umemfungulia mashitaka matatu ya kupokea pesa kinyume cha sheria, ufuaji wa pesa na eti kusaidia harakati za kigaidi.