Hiki hapa alichokisema Hans Poppe baada ya maamuzi ya TFF kuhusu sakata la Messi

Baada jana TFF kutoa maamuzi kuhusu utata uliojitokeza kwenye mkataba kati ya klabu ya Simba na Ramadhani Singano ‘Messi’, leo mwenyekiti wa kamati ya usajili ya Simba Zacharia Hans Poppe amesika kwenye kituo kimoja cha redio  cha jijini Dar es Salaam akizungumzia sakata hilo huku akihoji ni nani aliye mwambia Singano yupo huru?

Poppe amesema kikao kilichofanyika jana na kuongozwa na katibu mkuu wa TFF Selestine Mwesigwa hakikuwa na mamlaka wala madhumuni ya kuamua upi ni mkataba halali kati ya mkataba alionao Messi au mkataba uliopo Simba. Badala yake kilikuwa ni kikao cha kutafuta suluhu ili mambo yaweze kwenda sawa kati ya pande hizo mbili.

“Kikao kilichofanyika jana hakikufanyika kwa madhumuni ya kuamua nani kashinda na nani kashindwa, hakikuwa na ‘mandate’ hayo, hakina maamuzi ya kusema mkataba huu ni halali na huu sio halali. Katibu mkuu wa TFF amesema wazi kilichofanyika jana ni ‘mediation’, pale hapakuwa na maamuzi ya kuchambua mkataba upi upo ‘right’ wala hawakufikia hatua hiyo”, amesema Poppe.

“Ila walichokisema pale ni kwamba, kabla hatujafika kwenye kamati ya sheria na hadhi za wachezaji ambako pale ni mashtaka sasa na hukumu, hivi hili suala halizungumziki? Ndio kitu kilichofanyika jana na kilitokana na yeye mwenyewe ‘Messi’ kuulizwa, wewe ulivyozua hili varangati Simba ulikuwa unataka nini, kuondoka  Simba? Akasema hapana mimi nataka kuendelea kuchezea Simba. Akaulizwa mwakilishi wetu Collins akasema mbona sisi na mkataba tumesha mpatia?”, aliongeza.

“Ndio wakasema kama suala liko hivi linazungumzika, kwanini lisiende kwenye mkopndo huo. Kumbuka mwanzo mimi nilieleza kuwa, huyu mchezaji wakati amekuja kuhoji kuhusu mkataba wake na kuona kwamba yeye anazungumzia mkataba wake umeisha na sisi tunasema haujaisha, tulimweleza kwamba hili suala linazungumzika vizuri tu, kama wewe huutaki huu mkataba njoo tukae tukupe mkataba mpya lakini mkataba wako ni huu sasa yeye akaendelea kung’ang’ania na sisi tunaona hili suala ni bora lifike mwisho wake”, amesema.

“Kama hatutaelewana hakuna mkataba mpya mezani tunarudi kwenye mkataba wetu ulipo kwamba sisi mkataba wetu unamalizika 2016, sasa ndio tutakwenda kwenye kamati ya sheria na hadhi za wachezaji hao ndio watakaotoa uamuzi sasa mkataba upi ni halali”, amefafanua.

“Baada ya kutoka kwenye kikao cha jana, Messi kaenda kuzunmgumza kwamba yeye yuko huru sasahivi, aliyemwambia yuko huru nani? Mwesigwa kaulizwa pale kama mchezaji yupo huru kasema hapana, na haikutakiwa kuzungumza, mtu aliyetakiwa kuzungumza pale alikuwa ni katibu peke yake”, alisisitiza.

Chanzo:Shafihdauda.co

CUF Kuingia Ikulu, Na Ngamia Kupenya Kwenye Tundu Ya Sindano!

Waswahili husema; ‘atafutaye hachoki, akichoka keshapata!’.  Sadakta. Katika kutafuta kuna kupata na kukosa. Na ikiwa kuna kushindana, basi kuna kushinda na kushindwa. Vyovyote ilivyo, kushinda ni kupata, na kushindwa ni kukosa daima.

Msemo huu ni maarufu sana baina ya Waswahili wa kwetu. Lakini umaarufu wa msemo huu umezidi hasa baada ya siasa za vyama vingi kupamba moto nchini. Ambapo umaarufu mkubwa msemo huo umezidi kunoga na kupata ladha  baada ya chama cha Wananchi CUF kushindwa uchaguzi mara zote. Kushindwa huko, kukautumia usemi huu kuwa kama kipozeo na kiliwazo cha kushindwa!

Chama cha CUF kilipoteza uchaguzi wa mwaka 1995, 2000, 2005 na 2010. Awamu zote hizo, mgombea pekee alikuwa Maalim Seif Sharif Hamad ambaye hajapatwa kupingwa tangu muda huo. Kushindwa kuko, lakini kwa bahati mbaya CUF imekuwa ikikataa kabisa kabisa kuwa inashindwa kwenye chaguzi zote hizo.

Badala yake,  CUF hushikilia kutoa madai haya na yale na visingizio lukuki. Madai ambayo kwa muda wa miaka ishirini sasa, yameanza kukosa ladha.  Miongoni mwa madai makuu ya CUF kupoteza uchaguzi ni kudai ‘kuibiwa ushindi’ au ‘kutopewa uraisi’ na chama tawala CCM.

Madai ya CUF hapo awali yalikuwa yakiaminika kwa kweli, lakini kwa vile kila siku maneno ni yale yale, sasa CUF hata wakisema nini, wanaonekana kama debe tupu tu.  Haliachi makelele, ilhali halina kitu ndani. Na CUF kama CUF ni mfano wa debe tupu, kingi maneno, vitendo hamna! Watashindaje uchaguzi?

Mwaka 1995, tuseme kweli  CUF ilidhulumiwa au tuseme kuibiwa kama tulivyozowea kuambiwa. Lakini mwizi huiba mara moja, akirudi tena kukuibia wewe wewe, mahala pale pale tena katika mazingira  yale yale, ilhali unamuona na unamjua kama anakuja kukuibia, ukamwachia akaiba ukitegemea kuonewa huruma, huu ni uzembe usiostahamilika.

Na ni uzembe wa aina hii unaoigharimu CUF kila siku na katika kila uchaguzi. Kuna mengi ya kuikosoa CUF juu ya hili lakini tusiangalie kukosoana, tuwanie kuangalia wapi tunajikwaa na nini kilikuwa kifanywe.

Nina taarifa kutoka kwa kada mmoja mkuu wa CCM (jina kapuni) akisema kwamba CCM Zanzibar hawazidi asilimia 35 ya watu wote au wapiga kura wote iwapo watu wataandikishwa bila ubaguzi, hata CCM ikiandikisha na mamluki.

 

Kwa maana kama hii, ni wazi kuwa CUF ina wingi wa kura na wafuasi. Kauli hii pia inathibitishwa na viongozi wengine wa CCM akiwamo Bi Asha Bakari Makame. Bi Asha, amesema Gombani. Akarudi akasema tena katika bunge la katiba kuwa ‘’ikiwa CUF walishindwa kutawala 1995 hawatawali tena milele nchi hii.’’alieleza.

Kauli ya Bi Asha haikuishia hapo, akasema na sababu ya kuwa CUF haitashinda pia pale alipodokeza kuwa ‘nchi hii tumepindua, hatutoi kwa karatasi!’ Haya si maneno ya Asha Bakari. Ni ahadi na kauli mbiu ya CCM kwa ujumla wake. Huo ndio msimamo wao. Na kwa hakika wanautekeleza kwa vitendo.

Niliposema CUF wanamalizwa na Uzembe, nilisahau na vitu vingine viwili: Kujua sana na Kujiamini sana kunakotokana na kulewa sifa. Vitu hivi vitatu ndio mizimu inayoisumbua CUF miaka yote na kupelekea kushindwa katika kila uchaguzi huku wakisingizia kuibiwa.

Kuna Uzembe katika CUF. Uzembe wa awali na wa kilele ni ule uliofanyika mwaka 1995. Mwaka ambao licha ya vyombo vya habari kadhaa kutangaza ushindi wa CUF Maalim Seif alijifungia kwake Mtoni akisubiri aje aitwe akaapishwe kuwa Rais. Kusema la uhaki Maalim alishinda na hili linathibitika kwenye kauli hiyo ya Bi Asha Bakari. Lakini wapi?

Maalim alikaa kwake mpaka Nyerere akaja na kuwaambia TUME wamtangaze Salmin kwa sababu Maalim Seif alikuwa hajawa tayari kuwa Rais. Na hapo ndipo CUF walipojikwaa  sio kwa uzembe tu: na kulewa sifa na kujiamini kwingi.

Wakati CCM ikitumia chupu chupu ya uchaguzi wa 1995 kujifunza kutokana na makosa, CUF ilitumia makosa yale yale kama njia yao ya kujipatia ushindi katika chaguzi zijazo. Kimaumbile, huwezi kutumia makosa kupatia ushindi wa jambo sahihi. Makosa siku zote hukupa mwanga wa ulipojikwaa lakini hayakufikishi popote ukiyafuata.

CUF imekuwa ikirudia makosa yale yale  iliyoyafanya miaka ya nyuma. Makosa yenyewe sio mengi sana  kwani miongoni mwa makosa hayo, ni mbinu wazitumiazo CCM kuwashinda CUF. CCM, haijatumia mbinu nyingi kuishinda CUF: ‘Wembe wao ni ule ule’ wa ushindi kwani hawaoni haja ya kubadilisha wakati anyolewaye hajali atanyolewa vipi.

CCM hutumia wakati wa kuhesabu kura kuongeza zao kwa mujibu wa madai ya CUF. Wakikosa hapo, huficha visanduku vya kura kwa kutumia vyombo vya usalama na kufanya watakayo huko na mwisho hugeuza matokeo tu: ya CUF akapewa CCM na ya CCM yakarudi CUF. Siku hizi kumezuka utaratibu wa kuandikisha mamluki kutoka bara na kuongeza idadi ya wapiga kura watakaoibeba CCM. Hili liko wazi  na linaonekana  na kila mtu na hata CUF wenyewe ni mara kadhaa wamekua wakilisemea kwenye mikutano ya hadhara pia vyombo vya habari laki ni sawa na kupepea mwiku.

Makosa makubwa wayafanyayo CUF ukiacha yale ya uzembe wa viongozi wakuu wa chama, utayaona kwenye mawakala feki na wasimamizi feki wa chaguzi. Mara kadhaa, tunayaona ya mawakala wa CUF kununuliwa na kuachia visanduku vya kura vikiibiwa. Mara kadhaa, tumoena mawakala wa CUF wakiambiwa wakapate chakula cha mchana, na wakiondoka mamluki wa CCM huingizwa wakapiga kura mara mia mia kila mmoja, wakirudi hamna kitu.

Licha ya hayo, CUF haijajifunza kitu. Kama ilivyokuwa haijajifunza kitu katika kuchaguwa wagombea wazuri wa ubunge na uwakilishi, bado ni yayo kwa yayo. Wanachaguana akina wale wale walima mwani na visirani nakuacha watu ambao wananchi wenyewe wamewataka. 

Kwa mfano, aliyepitishwa kiti cha Uwakilishi jimbo la Tumbe ni kichaa maarufu na amewahi kufungwa mara kadhaa. Huyo ndiye mwakilishi wa watu wa Tumbe anaetegemewa kuja kuleta mabadiliko tuyatakayo. Na wengine wengi, funika kombe mwanaharamu apite. Abubakar amepita tena Mgogoni ilhali hana lolote alifanyalo: si jimboni wala si barazani.

Hivi sasa kuna uthibitisho wa kutosha kuwa CCM imeandikisha mamluki kadhaa na kuwanyima watu kadhaa haki ya kuandikishwa kupiga kura. CUF hili hawajaliona kuwa tishio kwao. Wana uhakika watashindwa kisha waje watwambie, tumeibiwa ilhali wameshindwa kwa idadi kubwa ya kura mamluki.

Wakati CCM ikijiandaa kufa kupona, liwalo na liwe, lakini nchi hawatoi, CUF wanaandaa maandamano makubwa ya kumpongeza Maalim Seif huku CCM wakijifungia ndani wakipanga mikakati madhubuti ya kuwamaliza wazembe, walewa sifa na wenye kujiamini bila kuwa ubavu wa kujiaminia kiukweli. Tumeona: wameongeza majimbo Unguja na kupunguza Pemba watakavyo. CUF inapiga makofi kwa Maalim kurejesha fomu.

Wakati CCM wakinadi kuwa hawatoi kwa kura. Viongozi wa juu wa CUF tunaowaamini zaidi akina Jusa wanaongea maneno yasiyo nafasi hata ndogo kwenye siasa za CCM Zanzibar. Juzi Jusa nilimnukuu akisema; ‘’Bakora ya kuwapiga CCM ni siasa za kistaarabu za CUF’’

Umeona wapi siasa za kistaarabu barani Afrika Jusa? Hivi CCM yuko tayari muuwane lakini ashinde, unafikiri ustaarabu wako atauelewa? Basi Jusa nikwambie kitu. Ustaarabu bara umefika juzi na haujaenea hadi leo, uko jina tu kama Uislamu ulivyo huko hivi sasa. Na CCM ni chama cha huko. Na wao wanasema hawatoi kwa kistaarabu sharti mpambane kwa sababu wao walipambana. Unaonaje hili?

Nionavyo, CCM wanachokisema ni kweli kwa sababu kina ushahidi. Hawakutoa 95, 2000, 2005, na 2010. Nina uhakika, kwa viongozi kama hawa wa CUF tulionao akina Jusa Mstaarabu, CUF  kuingia madarakani Zanzibar ni sawa na ngamia kupenya kwenye tundu la sindano. Tusidanganyane. Wala tusikubali tena kudanganywa.

Tusidanganyike kwa sababu, CUF  hata baada ya kuona mambo yote yanayofanywa na CCM kujihakikishia ushindi wa kishindo ambao kwa hakika upo, bado siku tu, hawajachukua hatua yoyote hile hadi sasa ikiwa tumebakiwa na takribani miezi minne kufika uchaguzi mkuu. Wao wanaona fahari kupokelewa kwa makundi ya wanachama wa CUF wasio na vitambulisho vya ukaazi wala vya wapiga kura, wakadanganyana kuwa watashinda uchaguzi.

Tusidanganywe,  maadamu CUF ikiwa ndani ya Serikali imeshindwa kuleta ushawishi wa kuundwa tume huru ya Uchaguzi, hakuna liwalo. Tutaishia kumpokea Maalim Seif kurudisha fomu ya urais tu, hatakuwa kamwe. Hatakuwa kwa sababu hataki awe. Anachokitaka ni hiki tunachokifanya, kumpokea na kutuchezea akili zetu kwa kutujaza tamaa za kuku lala lala!

Tusidanganyane, CUF haitashinda kwa sababu inajua inapojikwaa lakini inaendelea kupita hapo hapo kila siku. Itajikwaa tena na tena na mwisho, itaanguka chini, Na mwisho wenyewe hauko mbali. Ni mwaka huu. Iwapo hawataacha uzembe, wakapunguza kulewa sifa, na wakaacha kujiamini bila uhakika wa kupata ushindi, tujiandae tena kuwa wakimbizi wa kisiasa kama tulivyofanywa 1995 na 2001. Hakuna liwalo!

Chanzo: Mazrui media

Waandamana kwa kukosa waume wa kuwapa ujauzito Kenya

Wanawake waandamana nchini Kenya wakidai kukosa waume wa kuwapa ujauzito

Wanawake katika jimbo la Ndeiya walifahamisha kuwa waume zao wanashindwa kuwapa ujauzito kutokana na mwenendo wa unywaji wa pombe haramu ambazo zinaathiri nguvu za kiume.

Katika maandamano ya amani yaliofanyika katika kituo cha biashara cha Thigio, wanawake walioandamana Akhamisi walifahamisha kukerwa na wanaume wanaojihusisha na ulevi kupita kiasi.

Nancy Wangare alifahamisha kuwa katika kijiji hicho wanawake wachache walioolewa wamevumilia kwa kiasi kikubwa kutokana na upungufu wa nguvu za kiume kwa waume zao kutokana na pombe wanazokunywa.

Mmoja miongoni mwa wanawake walikuwa wakiandamana alifahamisha kuwa iwapo tabia hiyo ya ulevi haitorekebishwa basi itawalazimu kutoka nje ya ndoa zao na bila wao kujua lolote na kuwahudumia watoto wasiokuwa wao.

 Chanzo TRT

Taarifa Ya Kuahirishwa Treni Ya Kutoka Dar es salaam

Uongozi wa Kampuni ya Reli Tanzania –TRL unasikitika kuwataarifu wananchi na abiria waliokuwa wasafiri na treni ya leo Juni 09, 2015 kutoka Dar es Salaam kwenda bara kuwa safari hiyo imeahirishwa hadi kesho Jumatano saa 11 jioni.
Kwa mujibu wa taarifa hiyo sababu za kuahirishwa safari hiyo ni ajali ya treni ya mizigo iliyotokea usiku wa kuamkia leo Jumanne Juni 09, 2015 maeneo ya Stesheni za Ngeta na Ruvu mkoani Pwani ambapo mabehewa matano yenye shehena ya sukari yameanguka kabisa.
Tayari Wahandisi wa TRL wako eneo la ajali kufanya tathmini na kuanza zoezi la uokoaji, ikiwemo kazi ya kuyanyanyua mabehewa yaliyopata ajali na kisha kukarabati njia ili iwezwe kupitika mapema hapo kesho.
Uongozi wa TRL inawaomba radhi wananchi na wateja wake wote nchini kwa usumbufu utakaojitokeza.

Imetolewa na Afisi ya Uhusiano ya TRL kwa Niaba ya 
Kaimu Mkurugenzi Mtendaji ,
Mhandisi Elias Mshana,

Polisi yawatawanyisha CHADEMA kwa mabomu.

Jeshi la polisi wilayani Iramba limetumia mabomu ya machozi na maji ya kuwasha kuwatawanya wanachama wa chama cha Demokrasia na Maendeleo (CHADEMA) na kuwakamata Mwenyekiti wa uhamashishaji kanda ya kati Bi Jesca Kishoa na katibu wa BAVITA wilayani Iramba Bwana Rayman Minja, wakati walipokuwa wakiwahamasisha wananchi kwenye mkutano wa hadhara kujiandikisha kwenye daftari la kudumu la wapiga kura.(P.T)

Akieleza baada ya kuachiwa na jeshi la polisi alipokuwa amewekwa chini ya usalama kwa zaidi ya masaa matano mwenyekiti wa uhamashishaji CHADEMA kanda ya kati Bi. Jesca Kishoa, amesema anashangaa kuona Mkuu wa Wilaya ya Iramba akiwakataza kufanya mikutano huku vyama vingine vimekuwa vikifanya mikutano, jambo ambalo hastahili kufanya hivyo kwa sababu yeye anatawala wananchi wenye vyama tofauti na siyo chama kimoja.

Kwa upande wao, wananchi wa wilaya ya Iramba wametupia lawama kwa jeshi la polisi kuzuia mikutano minne ya CHADEMA, pia kutumia nguvu kutawanya watu kwa kuwa mwagia maji ya kuwasha na kuwapiga mbomu ya machozi.

Akionge kwa simu kamanda wa jeshi la polisi mkoani Singida, Bwana Thobias Sedoyeka amesema wao wanatekeleza amri ya Mkuu wa Wilaya ya Iramba ya kupiga marufuku na kuzuia maikutano yoyote ya hadhara ifanyike wilayani humo.

                                                           Taarifa via ITV                   

Mfumuko wa Bei wa Taifa kwa mwezi Mei 2015 umeongezeka

Mkurugenzi wa Sensa ya Watu na Takwimu za Jamii wa Ofisi ya Taifa ya Takwimu Bw. Ephraimu Kwesigabo akitoa taarifa ya kuongezeka kidogo kwa mfumuko wa bei nchini kwa mwezi Mei 2015 leo jijini Dar es salaam.Mfumuko wa Bei wa bei kwa mwezi Mei,2015 umefikia asilimia 5.3 kutoka asilimia 4.5 iliyokuwepo mwezi Aprili, 2015.

Ofisi ya Taifa ya Takwimu imesema kuwa Mfumuko wa Bei wa Taifa kwa mwezi Mei 2015 umeongezeka hadi kufikia asilimia 5.3 kutoka asilimia 4.5 ya mwezi Aprili 2015 kutokana na kuongezeka kwa kasi ya upandaji wa bei ya bidhaa na huduma katika maeneo mbalimbali nchini.

Mkurugenzi wa sensa ya Watu na Takwimu za Jamii wa Ofisi ya Taifa ya Takwimu (NBS) Bw. Ephraim Kwesigabo akizungumza na waandishi wa habari leo jijini Dar es salaam amesema kuwa kuongezeka kwa mfumuko wa Bei nchini kumesababishwa na kasi ya upandaji wa bei ya bidhaa za vyakula zinazotumiwa kwa wingi na kaya binafsi kwa mwezi Mei.

Amesema bidhaa za vyakula na zile zisizo za vyakula zilizochangia kuongezeka kwa mfumuko huo ni Nyama,Choroko, Maharage,samaki, nyama,unga wa mihogo.

Kwa upande wa bidhaa zisizo za vyakula zilizochangia kuongezeka kwa mfumuko wa bei ni bei za mavazi ya wananume kwa asilimia 5.6, mavazi ya wanawake kwa asilimia 3.5, vyakula kwenye migahawa kwa asilimia 4.1 na huduma za malazi kwa asilimia 4.2.

Kuhusu Fahirisi za bei kwa maana ya namna bei zinavyopanda kutoka kipindi kimoja hadi kingine kwa mwezi Mei zimeongezeka hadi kufikia 157.86 kutoka 157.21 za mwezi Aprili 2015 kutokana kuongezeka kwa bei ya bidhaa za vyakula ambazo ni mahindi, unga wa mahindi, samaki wabichi, ndizi ,mbogamboga,viazi mviringo ,maharage na mihogo.

Kwa upande wa baidhaa zisizo za vyakula zilizochangia kuongezeka kwa Fahirisi za bei kwa kipimo cha mwezi Kwesigabo amesema kuwa Mafuta ya Dizeli ambayo yamechangia kwa asilimia 3.2 na na mafuta ya Petroli kwa asilimia 5.8.

Aidha,kwa upande wa uwezo wa shilingi 100 ya Tanzania katika kununua bidhaa na huduma za mlaji kwa mwezi Mei , 2015 amesema umefikia shilingi 63 na senti 35 ikilinganishwa na kiasi cha shilingi 63 na senti 61 za mwezi Aprili 2015.

“Uwezo wa shilingi 100 ya Tanzania katika kununua bidhaa na huduma zilezile kwa mlaji kwa mwezi Mei ,2015 na Aprili ,2015 umepungua, hii inamaanisha sasa mtu anahitaji kuongeza ziada ili aweze kununua bidhaa na huduma sawa sawa na zile alizokuwa na uwezo wa kuzinunua mwezi Mei"

Kwa upande wa mfumuko wa Bei wa mwezi Mei 2015 kwa nchi za Afrika Mashariki amesema kuwa una mwelekeo unaofanana , Kenya umepungua kidogo hadi kufikia asilimia 6.87 na kutoka 7.08 mwezi Aprili,2015 huku Uganda mfumuko wa bei kwa mwezi Mei ,2015 ukiongezeka hadi asilimia 4.90 kutoka asilimia 3.60 za mwezi zilizokuwepo mwezi Aprili, 2015.(Muro)

'Uingereza, Marekani zinaunga mkono ugaidi Kenya'

Serikali ya Kenya imezituhumu Uingereza, Marekani, Norway na Finland kuwa zinaunga mkono ugaidi wa kundi la al Shabab kwa kutoa misaada kwa mashirika ya kijamii yanayoshukiwa kuwa na uhusiano na kundi hilo.
Katika barua ya Wizara ya Mambo ya Nje ya Kenya kwa balozi za nchi hizo mjini Nairobi, serikali ya Kenya imezitaka nchi hizo za Magharibi kusitisha mara moja misaada yao kwa mashirika hayo ya kijamii hasa kwa shirika la Haki Africa na Shirika la Waislamu Watetezi wa Haki za Binadamu (Muhuri).

Mashirika hayo mawili yenye makao yao mjini Mombasa ni kati ya mengine 85 ambayo serikali ya Kenya inasema inaamini yanafadhili ugaidi wa al Shabab nchini humo.

Katika taarifa hiyo, serikali ya Kenya imesema, katika hali ambayo serikali hizo za kigeni zinasema zinaisaidia Kenya kupambana na ugaidi lakini kuna ishara kuwa zinafanya kinyume ya hilo kwa kuchochea moto wa ugaidi.

Msemaji wa Wizara ya Mambo ya Ndani ya Kenya, Mwenda Njoka amesema baadhi ya mashirika hayo ya kijamii yamejitokeza wazi na kuwasaidia washukiwa wa ugaidi kwa kuwapa mawakili. 

Hata hivyo wakuu wa Muhuri na Haki Africa wamekanusha madai ya serikali ya Kenya kuwa wanaunga mkono ugaidi nchini humo.

Chanzo:Irbi