Mafuriko Nyumbani kwa Mh.Pinda

Mgombea Urais wa Jamhuri ya Muungano ya Tanzania kupitiaChama cha Mapinduzi CCM Dr. John Pombe Magufuli akiwahutubia wananchi katika mkutano wa kampeni wa Chama hicho uliofanyika kwenye uwanja wa Azimio mjini Mpanda mkoani Katavi  leo ambapo amehutubia mikutano ya hadhara mitatu katika mkoa huo  katika maeneo ya Mishamo, Katumba na Mpanda mjini.

Dr. Magufuli amewaomba wananchi hao kumpigia kura za ndiyo ili ashinde na  shughulika na matatizo ya wananchi  kwakuwa  anayaelewa matatizo na shida nyingi za watanzania, Dr. Magufuli ameahidi kukamilisha ujenzi wa barabara za Kasulu -Mpanda,  Sumbawanga – Mpanda , Mpanda -Tabora ili zikamilike kwa kiwango cha lami na kuwarahisishia wananchi katika shughuli mbalimbali za kiuchumi mkoani humo PICHA NA JOHN BUKUKU-FULLSHANGWE-KATAVI

Waziri Mkuu Mh. Mizengo Pinda kulia akiwa ameketi meza kuu pamoja na Mgombea urais kupitia CCM Dr. John Pombe Magufuli kabla ya kuanza kwa mkutano wa kampeni eneo la Katumba mkoani Katavi kushoto ni Mjumbe wa kamati Kuu ya CCM Ndugu William Likuvi. PICHA NA HABARI24

Mafuriko ya Chama cha mapinduzi (CCM), Jangwani

ACT-Wazalendo wavuna Wanachama 500 kutoka CHADEMA

Zaidi ya wanachama 500 wa Chama cha Demokrasia na Maendeleo (CHADEMA) wakiwemo viongozi wa kata mbalimbali katika wilaya ya Ludewa mkoani Njombe, wamekihama chama hicho na kujiunga na chama cha ACT-Wazalendo.

Zaidi ya wanachama 500 wa Chama cha Demokrasia na Maendeleo (CHADEMA) wakiwemo viongozi wa kata mbalimbali katika wilaya ya Ludewa mkoani Njombe, wamekihama chama hicho na kujiunga na chama cha ACT-Wazalendo.

Wanachama hao wamefikia maamuzi ya kukihama chama hicho huku wakiwalalamikia viongozi wao wa CHADEMA wilaya na taifa kumkata mgombea wao wa ubunge jimbo la Ludewa waliyemuhitaji Bwana Okol Haule na kumuweka mgombea wanayemuhitaji wao bwana Bathoromeo Mkinga.

Mamia ya wanachama hawa kutoka wilaya ya Ludewa, wamefanya maandamano ya amani kutoka mtaa wa Kilimahewa hadi katika ofisi za chama hicho zilizopo mjini Ludewa wakiwa na mabango ya aina mbalimbali yakilaani viongozi wa CHADEMA wilaya na taifa kumkata Okol Haule aliyeshinda katika kura za maoni kugombea nafasi ya ubunge katika jimbo hilo.

Hata mara baada ya wanachama hawa kuwasili katika ofisi za CHADEMA wilaya, viongozi waliingia mitini na kufunga ofisi, lakini dhamira ya wafuasi hawa wa CHADEMA wakiwemo viongozi wa juu kutoka kata mbalimbali za wilaya ya Ludewa, haikuishia hapo na wote wakiwa hawana imani tena na CHADEMA wakaelekea ofisi za ACT Wazalendo mtaa wa Sokoni na kujiunga nacho.
Huku wakidhamiria kuisambaratisha kabisa CHADEMA wilayani humo, wanachama hao wakiungana na mgombea wao wanayemuhitaji bwana Okol Haule wakachoma moto nguo aina ya kombati alizokua akizitumia mgombea huyo, bendera na kadi za CHADEMA ambapo bwana Haule anasema ameshindwa kuvumilia ubakaji wa demokrasia uliofanywa na viongozi wa CHADEMA. chanzo EATV

Mh.Mbatia awaonya Viongozi wa UKAWA

Wakati Umoja wa Katiba ya wananchi UKAWA ukikumbwa na changamoto ya ugawanaji wa majimbo baada ya maeneo mengi nchini Tanzania kuibuka migogoro mara baada ya majimbo ya uchaguzi kugawanywa kwa vyama hivyo,hatimaye mwenyekiti wa chama cha NCCR MAGEUZI ambaye ni mwenyekiti mwenza wa umoja huo ameibuka na kutoa onyo kali kwa viongozi ambao wanakuwa wabinafsi wa kutokutaka kuachiana majimbo na kusema kuwa ubinafsi ni jambo ambalo halitaendekezwa ndani ya umoja huo.

Akizungumza na wanahabari leo jioni hii Dar es salaam amesema kuwa mara baada ya kukamilika kwa kazi ya kugawana majimbo kwa vyama vinne vinavyounda umoja huo kumeibuka sintofahamu ya baadhi ya watu kungangania majimbo ambayo tayari wamepewa watu wengine jambo ambalo amesema kuwa sio makubaliano ya umoja huo na hawatavumilia viongozi wa namna hiyo.

Amesema kuwa moja ya maazimio makubwa ya umoja huo ni kuepuka ubinafsi na kuhakikishya kuwa mambo wanayoyahubiri kwa wananchi wanayatekeleza kwa vitendo ikiwa ni pamoja na amani na umoja hivyo hawako tayari kuona chama au mtu yoyote anaanzisha vurugu ndani ya umoja huo.

Amesema Tayari leo jioni viongozi wakuu watakutana kuona ni jinsi gani wanaweza kushughulikia jambo hilo ili ndoto za watanzania za kuhakikisha kuwa wanauondoa mfumo dhalimu wa CCM uliopo kwa sasa zinatimia na nchi inakuwa na amani na utulivu mkubwa.

Mlipuko wa ugonjwa wa Kipindupindu

Watu watatu wamekufa na wengine thelathini wamelazwa hospitalini kutokana na mlipuko wa ugonjwa wa kipindupindu nchini Tanzania na hasa katika mji wa kibiashara wa Dar es salaam.

Wataalamu wa afya wamesema kwamba mlipuko huo unapatikana kwenye maeneo ambayo hayana usafi wa kutosha na vyoo vya kisasa hasa katika maeneo yenye msongamano wa makazi katika jiji hilo.

Maafisa wa afya tayari wameshachukua hatua ili kuzuia mlipuko huo usienee zaidi tangu mlipuko mkubwa wa kwanza ulioripotiwa kulikumba jiji hilo mwaka 2009.

Wodi tengefu kwa wagonjwa wa ugonjwa huo imeshaandaliwa katika hospitali za wilaya ya Kinondoni eneo ambalo limeathiriwa vibaya na ugonjwa huo.

 Umma wa watanzania wametakiwa kuwa waangalifu baada ya kifo cha mwanamke mmoja mwenye umri wa miaka ishirini na saba,mwishoni mwa wiki iliyopita baada ya kuonesha dalili zinazoshabihiana na magonjwa ya milipuko.

Dar es salaam ni mmoja kati ya miji yenye idadi kubwa ya watu, mji huo pekee una idadi ya watu zaidi ya milioni tano.

Watu waishio katika makazi holela wako katika hatari kubwa ya kuambukizwa ugonjwa wa kipindupindu kutokana na kutokuwa na vyoo bora na vya kisasa .

CHANZO BBC Swahili

UTAFITI WA AFYA YA UZAZI NA MTOTO NA MALARIA KUANZA RASMI TAREHE 21 AGOSTI, 2015

 

Mgeni rasmi, Mwakilishi wa Katibu Mkuu, Dkt. Ahmed Makuwani kutoka Wizara ya Afya na Usitawi wa Jamii akiwahutubia Wasimamizi, Wahariri na Wadadisi wa Utafiti wa Afya ya Uzazi na Mtoto na Malaria Tanzania wa mwaka 2015 wakati wa hafla fupi ya kufunga mafunzo ya utafiti huo iliyofanyika leo Moshi, mkoani Kilimanjaro.

Wito umetolewa kwa viongozi wote wa Serikali katika Ngazi zote na wananchi kwa ujumla kutoa ushirikiano kwa Wasimamizi, Wahariri na Wadadisi wa Utafiti wa Afya ya Uzazi na Mtoto na Malaria utakaoanza rasmi tarehe 21 Agosti, 2015.

 

 Wito huo uletolewa leo na Mwakilishi wa Katibu Mkuu wa Wizara ya Afya na Ustawi wa Jamii Dkt. Ahmed Makuwani wakati wa hafla fupi ya kufunga mafunzo ya utafiti huo iliyofanyika wilayani Moshi, Kilimanjaro.

 

“Ninawaomba Wananchi kutoa ushirikiano wa kutosha kwa Wadadisi, Wasimamizi na Wahaririwatakaoshiriki zoezi la kukusanya Takwimu za Utafiti wa Afya ya Uzazi na Mtoto na Malaria wa mwaka 2015 ili kupata taarifa muhimu na sahihi kwa ajili ya kupanga Mipango na Sera endelevu za Sekta ya Afya katika nchi yetu, amesema Makuwani”.

 

Dkt. Makuwani amesema kuwa taarifa zitakazokusanywa kwa wananchi kwa ajili ya  utafiti huo zitakuwa ni siri na zitatumika kwa shughuli za Kitakwimu tu na wala hazina uhusiano wowote na Uchaguzi mkuu wa Mwaka huu.

 

Mkurugenzi Mkuu wa Ofisi ya Taifa ya Takwimu Dkt. Albina Chuwa akielezea umuhimu waUtafiti wa Afya ya Uzazi na Mtoto na Malaria Tanzania wa mwaka 2015 wakati wa hafla fupi ya kufunga mafunzo ya utafiti huo iliyofanyika leo Moshi, mkoani Kilimanjaro.

kwa upande wa Mkurugenzi Mkuu wa Ofisi ya Taifa ya Takwimu Dkt. Albina Chuwa amesema utafiti huu wa Afya ya Uzazi na Mtoto na Malaria wa mwaka 2015  unalenga kukusanya taarifa nyingi za sekta ya afya zinazotumika katika kutathmini malengo mbalimbali na pia kusaidia katika kupanga mikakati mipya.

 

Ofisi ya Taifa ya Takwimu kwa mara nyingine tena inafanya Utafiti wa Afya ya Uzazi na Mtoto na Malaria wa mwaka 2015 ambao kwa mara ya mwisho ulifanyika mwaka 2010. Utafiti huu utaanza rasmi tarehe 21 Agosti, 2015 kwa nchi nzima na utamalizika mwishoni mwa Mwezi Februari 2016.source.Fullshagwe

Nasrullah aikosoa Marekani kwa kuitumia Daesh

Katibu Mkuu wa chama cha Hizbullah cha Lebanon amesema kuwa Marekani inalitumia kundi la kigaidi la Daesh kuligawa eneo la Mashariki ya Kati. 

 Sayyid Hassan Nasrullah amesema kuwa Washington na waitifaki wake wanatumia ugaidi hususan kundi la kigaidi la Daesh kama wenzo wa kutekeleza mpango wa kuligawa eneo la Mashariki ya Kati, kuanzia Iraq hadi Syria na hata Saudi Arabia kwa sababu mpango huo unafanyika kwa maslahi ya Marekani na utawala wa Kizayuni. 

Sayyid Hassan Nasrullah ameyasema hayo jana usiku katika hafla ya kuadhimisha mwaka wa tisa wa ushindi wa Muqawama wa Lebanon dhidi ya utawala wa Kizayuni katika vita vya mwezi Julai mwaka 2006. 

Katibu Mkuu wa Hizbullah amesema kuwa upo udharura wa kupinga na kukabiliana na mpango wa kuligawa eneo hili. 

Amesema njama ya kuigawa upya Mashariki ya Kati itasababisha vita vya ndani na vya kikaumu vya muda mrefu, ambavyo matokeo yake yatakuwa uharibifu, maafa na kuongezeka idadi ya wakimbizi.Chanzo Irib